مقلط رشيد الحوطي

بعد معاناة 7 سنوات في المتوسطه واخيرا وليلي بعد نجحت وقدمت على العسكريه اول يوم رحت عطونا استمارات نعبيها ونجيبها ثاني يوم قالي واحد بكره بيطلبون منكم كشف طبي كامل وترا يخلونكم تتفصخون عشان الكشف انا ضاق صدري ياخي شينه فيها عوراة مسلمين وفيها قبايل  المهم رحنا ثاني يوم وعطونا اوراق للمستشفى العسكري ورحنا لهم وكنا تقريبا مجموعه كبيره اول ماقالو فصخو هم طبعا قصدهم خلو عليكم السروال القصير وخويي كان يلعب علي وانا على نياتي مصدق طبعا وزعونا مجموعات كل مجموعه تروح لأخصائي العيون الصدر وكذا يعني انا اول دكتور رحت له وكان معه ممرضه مصريه بسوي ماهمني وانا ترا رجال واطقع ماشوف قمت وفصخت كل شي في الغرفه وطلعت على الدكتور والممرضه صلت ملت قالت الممرضه ( ايه ده يخرب بيتك ليلتك مطينه بطين روح البس ) صراحه وقتها ودي الارض تبلعني يلعن اؤم الفشيله ياشيخ واذكر خويي واسب والعن فيه المهم لبست سروال السنه ابو ربقه وطلعت ومسوي ترا ماهمني غلطه ملابسيه خلصت من دكتور الصدر ومعي مجموعه رحنا للمختبر وراي واحد طعس جاي من البر سيده للعسكريه واطالع في اوراقه واقراء فصيلة دمه ( o+ ) قلت ترا او زايد فصيلة حمار امزح معه مادريت الا طالعني بعين قلت حتى انا والله فصيلتي او زايد مثلك توهقت قلت بيدبغني الحين رحنا دكتور العيون انا طبعا عندي عيني اليسار ضعيفه وبرضه عما الوان دخلت على الدكتور وراني رسمه كلها الوان داخله في بعض

<< ياليل الورطه قالي وش مكتوب داخل الالوان ؟؟ قلت مافيه شئ قال (يبني ركز واؤلي ايه مكتوب ماتتعبش ألبي ) قلت ياخي مافيه شئ قام وكتب على ورقتي راسب في النظر طلعت من عنده قالي واحد تعال مكتوب في وسطها رقم 13 ادخل ثانيه وقله معليش ماركزت يمكن يعيد لك الاختبار دخلت والله ابشركم مشت الدعوه

خلصنا من حق العيون وكملنا باقي الكشف لحد آخر شئ المقابله النفسيه طبعا اللي كان يقابلنا بعضنا قابلهم الدكتور ( راشد الشمراني ) الممثل المعروف طبعا اللي اعرفه انه برضه ظابط ودكتور نفساني الله يوفقه والبعض دكتور ثاني ومن المواقف اللي سمعتها عن الدكتور الشمراني المضحكه واحد دخل عليه وقاله ( بالله التسعاوي اللي برا لك ) يقصد دوره في مسلسل احلام سلوم على ماظن يوم كان بدور عربجي وراعي قلابي

ماعلينا خلصنا وبحمد الله الكشف الطبي وقبلوني في الدوره وعطونا ورقه فيها وش تحضر معك يوم الجمعه من ضمنها ملابس داخليه فوط عدة حلاقه حضرنا يوم الجمعه بعد العصر وجانا ظابط ووزعنا ثلاث مجموعات احلى شيئ مجموعتي كلهم او اغلبهم من اهل الرياض وحواطى ودواسر يعني عيال قريه على قولتهم وطحت في شله كلهم مهبل من اول ليله طبينا من فوق السور رحنا تعشينا مندي ورجعنا يوم رجعنا لقينا المناوب اللي مستلم بالليل يحترينا قال هلا والله وينكم فيه قلنا ابد رحنا نهرول ورا البركسات عشان اللياقه تكون حلوه قال لا ياشيخ انت وياه امتد ياعسكري انت وياه يله
<< امتد = انبطح على بطنك وبدأ الشغل الجد من تلك اللحظه